Jaguar「快的」載你入地獄

Jaguar 係 Nürburgring 推出全新 "Jaguar Race Taxi" 體驗! 參加者可以坐住由專業車手駕駛的 Jaguar F-TYPE SVR 同 XJR575 係有「綠色地獄」(The Green Hell) 之稱的紐堡靈北環賽道親自體驗這條全球聞名，共有 73 個彎，全長 20.83 公里的賽道可以令人有幾膽戰心驚又血脈沸騰! 特別係過幾個急彎時，重力可高達  1.2G!

加上負責接載「乘客」的 F-TYPE SVR 與 XJR575 亦係為賽道而生的「怪獸級」跑車! 兩部「快的」均搭載 5 公升 V8 Supercharged 引擎，釋放最大 575PS 馬力，XJR575 0-100km/h 加速為 4.4 秒，最速時速 (電子限速) 為 300km/h；至於出自 Jaguar Land Rover SVO 部門手筆的 F-TYPE SVR，0-100km/h 加速僅需 3.7 秒，最速時速可達 321 km/h。

想搭「Jaguar 的士」無得用 App Call，要登入網頁登記及預訂，體驗暫定提供至 11 月，每一圈收費為 €199 (約 HK$1,854)，重會有高清行車紀錄拍得你嘅「反應」! 整個體驗歷時約 30 分鐘，包括安全講解，坐上「的士」跑一圈北環賽道，及重溫錄影片段，只供年滿 18 歲或以上人士參加。F-TYPE SVR 每次只可以載一人；XJR575 則可載一至三人，收費係逐圈計而非計人頭，即係話揀坐 XJR575 可以做「泥鯭的」€199 除三份，但揀坐 F-TYPE SVR 就要獨自「包車」，你又會點揀呢?