二手好車5至7萬揮手區

數萬元一部的二手好車，除了又有型又夠豪的第一代平治 CLS，市面上仍有大量其他選擇，今期羅渣就以 5 至 7 萬元為限，揀一些抵用好車，部分款式，可能你諗都未諗過。

Text: 羅渣

第一代 Boxster 花多眼亂

保時捷第一代 Boxster 眨眼間面世已超過廿年，一直是羅渣的「占卡」之一，曾幾何時，認為 Boxster 的二手價跌至 20 萬元已可能會見底回升，點知就好似 5 蚊雞買聯想股票諗住撈底博反彈嘅股民一樣，價格一跌再跌，幾年前，二手 Boxster 價格跌穿 10 萬元大關，就好似聯想跌穿 4 蚊心理關口咁，都仲未摸底! 最近，第一代 Boxster 二手價已普遍在 5 至 7 萬元區域尋找支持，不是 97/98 年頭批 2.5 才咁平，連 01/02 年的 Boxster 2.7 及 Boxster S 3.2 都係這個價。老實講，一部當年賣六、七十萬的開篷波子，現在只是新車價的一成，其實真係「抵到無朋友」，隨時一部似樣些少的第一代 MX-5，「搏大霧」的賣家也不止要這個價，咁點解唔坐保時捷?「卡士」完全高幾班啦!

日產 Fairlady 長揸變經典

保時捷 Boxster 價格幾時見底回升，羅渣就無水晶球，如果用 5 至 7 萬元「畢直」玩跑車，二手價可能已在「打底」的日產 Fairlady 350Z，長線值得博反彈。

對「畢直」唔多，「家底」又不是太厚的玩家，好多都對歐洲二手車唔敢沾手，因為怕問題多，夠錢買但驚無錢整，所以平玩經典的車迷，好多只係從日本小跑車入手，因為他們堅信日本車小毛病較歐洲車少，保養開支亦會便宜一點。

不過，七八九十年代的日本車鋼水普遍唔及歐洲車，生銹問題時有所聞，車身一旦有銹，其實係好難搞嘅，再投資落去只係無底深潭。在眾多日本廠牌裡，日產的鋼水在 1990 年代開始已經好好，正常無碰撞維修過的車身，好少會有生銹問題，而 Fairlady 本身又係日產的經典車款，現價買 350Z，日常維修保養開支應在預算之內，長揸有條件變經典。

Golf GTI Pirelli 全港 61 部

福士自從 2008 年 9 月開始，香港代理業務由廠方直接經營，話咁快就十年，由廠方直銷，優點之一是某些小批量生產的車款，香港都有可能分到少量配額，就好似第五代 Golf GTI 款尾階段才上市的 Pirelli 特別版，廠方便合共引入了 61 輛，其中 52 部在 08 年底交車，另外 9 部在 2009 年抵港，隨後第六代 Golf GTI 便告上市。

2008 年，普通自動波 Golf GTI 新車售 HK$298,000，Pirelli 版貴 1 萬，賣HK$308,000，貴少少皆因周身係寶，2.0 公升 Turbo 引擎輸出由 200 匹調升至 230 匹， 輪圈亦改用特別版 Pirelli 鈦金屬色 18 吋專用輪圈， 並配上 Pirelli P ZERO 輪胎，車廂內的布座椅表面有獨特的車胎紋，車尾則有 Pirelli 徽章。

供應量少的好車向來有識貨之人，Pirelli GTI 近年二手開價一直比普通 Golf GTI 貴兩萬元左右，7 萬元以下的放盤只會偶然出現，一定要全原裝車才搶得過。

寶馬 E91 旅行車用家講

上月某天，羅渣晨早收到一位老友連續幾個查詢二手車行情的 WhatsApp，目標車款是 2005 至 2012 年款的寶馬 3系旅行車 (E91) ，老友想以此作為家庭用車，對該車的可靠性非常著緊，羅渣反問點解專攻 E91，他說牌簿價五、六十萬元，二手價五至七萬銀有交易，覺得好抵喎!

香港地養車有個特點，就是新車稅貴，車價折舊又快，新車落地十年八載後，好多車都是牌簿價貴、二手價平，以此作為揀車條件，隨時買到破產都買唔完! E91 同好多車齡十年八年的舊車一樣，寧願貴少少買保養好、里數低的放盤，都不要貪平。但我知這樣回覆唔夠老友，所以再問了另一位新車買 E91 用足六年的朋友指點迷津，朋友這樣回答：「我揸了 6 年 (2006-2012)，電子嘢過了 4 年左右開始有少量問題，不會影響行車安全，但錶板會著燈，要查 code 才知是否嚴重。我部車就無大問題，可能與我返廠維修有關。」

新車一樣棍仔 AE110 Wagon

不一定要 Super Car 先可以俾人「恭奉」，有很多價錢大眾化的平民車，只要有特別條件，都會引起哄動，好像最近《車王》編輯部班大佬，便有相熟老友早前在日本 bid 了一部豐田 Corolla 1.5 運港自用，對方講明一路用、一路賣。聽講幾位編輯仲幫那部 Corolla 私影了幾張相來傳閱，羅渣好奇為何一部 Corolla 會如此吸引，了解過後才知道那是一部 AE110 旅行車，棍波，而且咪數極少，咁就明白晒喇! AE110 旅行車當年代理無入口，羅渣睇過相，錶板里數錶數位整齊一字排開，剛過 4 萬公里，引擎艙、車廂及車殼都接近新車狀態，現任車主意向價是五萬餘元，坊間一些舊一款的 AE100 Wagon 棍波旅行車，隨時兩萬元獲承接，5 字頭買 AE110 Wagon 是否物有所值? 好視乎你想要乜，買罕有、買質素，其實又唔貴。