[embedyt]https://www.youtube.com/watch?v=i26BdZyd7OY&feature=youtu.be[/embedyt]
記唔記得 2014 年碧咸現身荔枝角被「野生捕獲」？當時只係大約知道碧咸去咗上市公司利標品牌（Global Brands; SEHK:787）傾自家品牌合作大計。後來，由 David Beckham、Simon Fuller 與利標建立嘅合資企業 Seven Global 正式成立。原來除咗市場盛傳嘅服裝系列之外，碧咸同 Seven Global 即將進軍男士護膚界！
畢竟碧咸係踢波出身，知道係商場上同樣要有一班「好隊友」先踢得出好成績，而呢位萬人迷進軍男士護理界，就搵嚟同等份量 — 高檔男士護膚領域第一品牌 BIOTHERM HOMME 做佢「新隊友」，係未來幾年「拍住上」。碧咸唔單止成為 BIOTHERM HOMME 的首位全球形象代言人，更會同品牌共同開發男士護理系列產品，預計呢個 BIOTHERM HOMME × David Beckham 護膚和日常護理產品系列要到 2017 年先會正式面世。
至於碧咸為 BIOTHERM HOMME 拍攝嘅首個廣告將會係 6 月於網上播出，但為咗宣佈今次同 BIOTHERM HOMME 嘅長期合作大計，碧咸特別拍咗條短片分享佢嘅個人護理哲學。
男神不愧係男神，一條短短 30 秒嘅宣傳短片一樣可以袋錢落男士袋。「咸爺」話咪以為佢嘅皮膚有乜嘢得天獨厚的過人之處 — 其實同你我「凡人」一樣粗糙並帶少許敏感，今時今日佢之所以擁有 Cool 到爆嘅皮膚其實來自不二法門，做好潔淨及保濕功夫，正如當日讓佢獨步球壇嘅「七旋斬」110% 係由後天練習得來，絕非「天才波」。碧咸重話自己日日只須 7 分鐘就完成護理步驟就可以出得門口湊「哈七」番學，如果你每朝用多過 7 分鐘但依然 charm 唔過碧咸的話，你就要好好反省一下係咪用錯咗牌子喇！最後，碧咸重有「金句」醒俾一眾男士：“It’s not just about how you look, it’s how you feel.” 再加埋基本 gentleman禮儀同埋對勝利嘅渴望同執著，「男神」原來就是這樣鍊成的！
