LEGO 為法拉利加持

話就話法拉利車隊車手 Sebastian Vettel 目前領先 F1 車手榜，不過優勢正逐漸縮減之餘，車隊目前係總成績亦以 348 分屈居於平治車隊 (392分) 之後，所以嚟緊今站意大利站法拉利勢必要成功「搶分」!

而雖則歷史上法拉利車隊係意大利「主場」Monza 賽道贏過 19 次冠軍，傲視群雄，不過對上一次勝出該站已經要數到 2010 年靠 Fernando Alonso 掄元! 「主場優勢」近年都幾唔明顯……所以 LEGO 決定係賽前幫法拉利車隊打打氣!

年中 LEGO 曾經推出 Speed Champions 系列 Scuderia Ferrari SF16-H 賽車積木模型，造工相當像真精美，早前 LEGO 決定向高難度挑戰，打造咗一架 1:1 真實原大嘅 Scuderia Ferrari SF16-H LEGO 戰車，相當大工程㗎! 設計開發用咗 844 小時，然後再用 750 小時，先至將 349,911 塊 LEGO 積木按設計砌成呢架原大法拉利 F1 戰車。總重量為 1,250 磅，輕過 1,548 磅重嘅實物少少。