要威,一定要戴頭盔 BAC Mono

25 Nov, 2017 By vincentcheung@scmedia.com.hk

一如駕駛任何四個轆的機動車輛,都無法例硬性規定需要或不可以戴頭盔開車,不過 Mono 天生就無擋風玻璃,上高速公路前車濺起一粒石仔就可以隨時令你「中槍」玩完! 就算要威,都一定要戴頭盔!

Text: Alex Tam   Photo: 鄭昌榮;Alex Tam

BAC (Briggs Automotive Company Ltd.) Mono 是一部打正英國賽車工業旗號(95% 零件來自英國供應商),而又合法在一般街道上行駛的單座位 Supercar;以幾何狀搭建鋼管車架 (Tubular chassis) 並在外圍、車底包覆上碳化纖維夾層,頭頂防滾護架符合 FIA 規格,極高剛性車架與初級方程式賽車無異。過去也曾經有人嘗把性質相近的無頂跑車引入香港,最後都礙於食古不化官僚作風而作罷,今次 BAC Hong Kong 終於排除萬難,讓 Mono 可以出牌正式在香港路面上行駛。

本來已經代理安排好試車時間,畀機會我在香港大街大巷招搖過市,「得戚」一下,再放上 FB 呃下 Like。試車日子臨近,某天WhatsApp 訊號響起:「計劃有變,帶齊架生上珠海。」於是,我與 BAC Mono 的首個約會改了在星期六 ZIC 見。對我而言,比在跑道上試駕 Mono 更加興奮的,是在活動中與兩位多年沒見面的香港傳奇車手 Charles 和 Henry 傾計。屈指一數,上一次跟 Henry 一起在石澳道試標致 306 GTi-6 已經是 20 年前了。近年專心從商的 Henry,闊別賽車場 6 年後組織 A&N 賽車隊,再次駕駛 BMW 賽車角逐 SEC 超級耐力賽,在剛過去的十一國慶 SEC 廣東 6 小時耐力賽再下一城,奪得全場總亞軍與超級組冠軍;Charles 在 2004 年鬥過 FIA GT 賽之後,已經絕跡賽事十多年,今次為撐好友,前一晚剛出在廣州舉辦的 BAC Mono 發佈會擔任揭幕嘉賓,第二天清晨再由香港趕往珠海賽車場出席試駕活動。

今次代理安排了 5 部 Mono,其中有部分搭載了新款 2.5 升機器,輸出最大馬力 309 PS/ 8,000 rpm 與 31.4kgm / 5,500rpm 峰值扭力,較原來的 2.3 升版本多出 20 匹馬力與 3.0kgm 扭力。車,我就試過了,不過咁難得遇到兩位絕世高手來試車,在下亦無謂「班門弄斧」,今次測試報告就交畀他們啦!




Charles Kwan 關兆昌試後感

轉了 2.5L engine 後,架車快咗好多。上一次試車時仲係 2.3 版本,個 chassis 好好、車胎又好咬地,架車 grip 好強,要將部車推到好極限先可以 power slide 出彎,現在新版本更加 balance,馬力大了但又不會 over power。事實上,馬力再大啲更好,因為呢副 chassis 的承受能力遠遠不止呢個程度。而家部車非常好渣、好易 control,好容易預計到入彎會 understeer 或 oversteer,車身好輕, 可以好遲收車 late brake 入彎。剛開始時因為好耐無鬥車,一時間未掌握到部車, 入彎都慢了,後來習慣後有返感覺,於是逐漸增加彎速,估計再揸十圈八圈都可以做到不錯圈速。整體來說,目前的 setting 十分中性,只有輕微的推頭,好易 control 同 predict,擺多些 weight transfer 又可以條尾行快些少入 hair pin 彎。

我覺得 Mono 響跑道上表現,更接近GT 多於 Formula,真正的 Formula 賽車可能 power 較少但 grip更大。而家 Mono馬力大了,出彎速度快了更接近一部 GT,如果可以擺副更勁的 engine 就更加正。現在只係用上較軟質地的街胎,要換上賽車 slick 胎先知可唔可以造到 GT 級數的圈速。響快彎明顯感覺得到 down force,架車好定,T14 拖 4 波扭軚衝入去再踩油出彎一路都好 stable、好聽話。在日常街道上根本無可能試到佢極限。

 

Henry Lee 李萬祺試後感

我四月分已經試過一次 2.3L 版本,今次是第二次响珠海跑道試 BAC Mono。呢部車畀到我的感覺,鈎起我當年鬥小型賽車的回憶,架車好輕巧、好好力、煞車好強、靈活,因為車身輕,加、減速都特別勁,絕對係一部為賽道而生的跑車。

對比同樣係三、四百萬元的波子、拉利等 GT 跑車,BAC Mono 完全不同,是另一個層次,佢係一部近似方程式的跑車,就算與 GT3 賽車都無得比。講興奮感,BAC Mono 更加係贏晒,首先部車無車頂,開車時啲風撲面而來,涼浸浸,而且座位完全貼住地下,速度感、路面感特別強,感覺與渣方程式一樣。

雖則部車好接近方程式,但我唔感覺到佢有好強的 downfarce。始終部車只裝上高性能街胎,儘管過彎極限已經畀一般跑車高好多,但我認為可以再快好多,若果換上賽車 Slick 胎,估計圈速至少可以再快 5~6 秒。





SPEC.
引擎 2,488cc 直四汽缸DOHC 16V
馬力 309 PS/ 8,000 rpm
扭力 31.4kgm / 5,500rpm
傳動 Hewland FTR 6 前速手動序列式波箱,中置引擎,後輪驅動
懸掛前/後 獨立可調推桿式雙搖臂,配 Sachs racing RDS – 36 2 路方程式避震,可調校防傾桿
制動前/後 295mm 通風碟,AP Racing 前/後四活塞卡鉗
最小迴旋半徑 5.85m
輪胎前/後 205/40 R17;245/40 R17 Kumho Ecsta V700
長x闊x高 3,952 x 1,836 x 1,110 mm
輪軸距 3,004 mm
車重 580 kg
總載客人數 1
油缸存量 35L
0-96km/h 2.7s (廠方數字)
極速 274km/h (廠方數字)
查詢 BAC Hong Kong Limited.

Related POSTS