神級法拉利車庫曝光

位於美國俄亥俄州嘅汽車維修、改裝及保養公司 ESOTERIC 日前公開佢地其中一位尊貴顧客嘅車庫，真係睇到人目瞪口呆!!!

呢個私人車庫收藏咗多部法拉利，包括：限量 272 部嘅 288 GTO (1984-1986)；限量 1,311 部嘅 F40 (1987-1992)；限量 349 部嘅 F50 (1995-1997)；限量 400 部嘅 Enzo (2002-2004)；至於為紀念法拉利創立 70 周年而推出，限量 500 部嘅硬頂 LaFerrari (2013-2015) 同限量 209 部嘅開篷 LaFerrari Aperta (2016-) 亦各有一部! 聽講部份珍藏連出廠嘅窗貼都未撕開! 好明顯呢位收藏家真係視法拉利嘅超跑為藝術品多於超級跑車。

呢個「Ferrari Only」車庫共有四層，佔地 8,500 平方尺，單係裝修就耗時三年先完成，係牆上極當眼嘅法拉利 Cavallino 金屬紋章更係來自法拉利舊馬拉內羅廠房之大門! 重有過百個木刻裝飾，展示現代汽車嘅發展史，而整個車庫的音響設備也是由專人特別打造!!!

車庫內特設有一個旋轉台展示最矚目嘅收藏，目前嘅「台柱」當然係 LaFerrari Aperta 啦! 其它設施還包括設有汽車升降台嘅維修區、供俯瞰一眾主要收藏嘅閣樓，亦有有一個巨型偏廳供車主休憩同招呼朋友飲下紅酒，食下雪茄咁……每年 ESOTERIC 都會造訪呢個車庫兩次為一眾收藏提供車身保養服務。與其話係「車庫」，不如形容佢做「私人法拉利博物館」可能更加貼切!!!

相片來源：ESOTERIC