Deliveroo 年度「十大最受歡迎美食」
對於好似我呢啲「為食」但又唔多願「旭」嘅人嚟講，2017 年最大嘅喜訊就係各個外賣速遞 App 百花齊放，同埋有越嚟越多餐廳加入速遞陣營，係手機㩒幾個制，好快就有美食直送府上，方便省時。而「龍頭」之一 Deliveroo 戶戶送早前亦公布十款 2017 年最高銷量菜式，一於睇下入面有無你嘅 favorite 啦!
第一位：自選麵包卷 (MANA! Fast Slow Food)_MANA! 嘅出現令到唔少人發現好味同健康原來唔一定係勢成水火! 餐廳嘅招牌自選麵包卷 (Flat)，備有油炸鷹嘴豆餅及醃菜等眾多素食餡料可供選擇，健康有營養兼食得環保，難怪今年高踞榜首!
第二位：夏威夷刺生飯 (Pololi)_日式刺生飯向來受香港人歡迎，不過由細食到大難免有啲悶……佢嘅「夏威夷遠房親戚」Poké (夏威夷刺生飯) 嚟到香港再食正「健康快餐」熱潮成功大受歡迎! 香港 Poké 始祖 Pololi 提供多個自選口味和配菜，兼營養豐富，一班健康型男美女日日食都唔悶!
第三位：Biang Biang 麵 (有緣小敍)_ 就算未贏得米芝蓮「車胎人美食推介」之前，「有緣小敍」憑其風味獨特嘅正宗陝西西安菜已經打響名堂，而一碗碗 Biang Biang 麵睇落做法簡單，但豐富層次味道及麵條口感無出其右，亦成為唔少「港漂」慰解鄉愁嘅美食。
第四位：越南生牛肉粉 (BEP Vietnamese Kitchen)_老老實實 BEP 個 phở bò 未必係城中最好味，不過贏在性價比之餘，話晒係中環紮根多年，以前重叫「芽莊」個陣已經係威靈頓街儲落唔少粉絲，一碗熱騰騰嘅湯粉，早已成為唔少中區上班族嘅 comfort food。
第五位：碳燒鐵觀音 (茶湯會)_台式飲料基本上已經同火鍋睇齊，一年四季無分冷熱都咁受歡迎! 當中又以「茶湯會」最具叫座力兼有最多「鐵粉」，所以佢嘅「碳燒鐵觀音」能夠打入頭十名實在不足為奇。
第六位：沙嗲雞肉串 (Thai On High)_Thai On High 的沙嗲雞肉串贏在「先天」上醃得夠入味；「後天」上燒得恰到好處，再配上香濃惹味嘅正宗花生沙爹醬，真係要「打打聲」咁 order 先夠喉!
第七位：The Burger 漢堡 (The Butchers Club Burger)_The Butchers Club Burger 嘅 The Burger 漢堡選用自家製熟成安格斯牛肉，肉香濃郁，肉質鬆化，配以芝士、蕃茄、醃菜和秘製醬汁，味道出眾，唔怪得係競爭嘅激烈嘅「Burger 界」中依然可以一支獨秀。
第八位：化骨綿掌撈麵 (麵三館)_「麵三館」招牌菜「化骨綿掌撈麵」嘅豬腳鬆軟嫩滑，入口即溶，試過一次之後真係成日心掛掛㗎!
第九位：小籠包 (上海姥姥) _「上海姥姥」嘅小籠包肉餡鮮甜多汁，雖然最理想梗係堂食新鮮食啦! 不過外賣極速送到，雖然味道難免打少少折扣，但總好過無得食!
第十位：芒果班戟 (地茂館甜品)_芒果班戟係就係周圍都有……不過可以做到好似「地茂館甜品」嘅出品咁「皮薄餡靚」就真係寥寥可數 — 薄薄餅皮內藏啖啖新鮮果肉，配上軟滑的忌廉，唔怪得遠近馳名!