井柏然型戴積家

果然不出所料，一眾中國女星再度憑出位「騎尼」造型「揚名」今屆康城影展 (Festival de Cannes 2016) 。好在「男子組」方面成功爭番啖氣，其中「十億票房」男星井柏然唔單止著衫無甩拖，重識得揀錶配襯不同造型，學嘢喇喂！ 去康城行紅地毯固然係指定動作，其中井柏然以一身禮服造型現身紅地毯，型格得體之餘，重識得佩戴番一枚同樣優雅的積家 Reverso 翻轉腕錶。

當唔駛行紅地毯，而係以相對 casual 少少的型格造型出席其它宣傳活動時，井柏然就換上另一枚積家 Geophysic Universal Time 地球物理天文台系列世界時間腕錶，錶盤上的地圖圖案夠晒搶眼，同一些色調鮮豔的服裝也出奇地合襯，重可以一眼睇晒 24 個不同時區的時間，咁井柏然就隨時知道老家而家幾多點啦！