新年見盡駕駛百態

16 Feb, 2021 By mickeyloi@scmedia.com.hk

新年相信大家都遇上唔少Holiday Car Driver 或雪藏牌,大家呢段時間,又或者平時揸車遇過最無奈嘅事有咩?等小編係到舉幾個例子:

1. 開蓬行highway突然落大雨

小編親眼見過一部開篷車喺東區走廊開住個蓬,突然一陣大雨令兩人同架車都濕哂,最重要係有啲司機為左要即刻關蓬,佢會係高速公路突然收到得返十幾,後面啲車有時唔留心,就真係多得佢唔少。

2. 一洗完車轉個彎比洗地呀姐用佢支水喉幫你車側再洗多次

先用一個鐘時間等到位洗車同吸塵,再用二十分鐘等架車洗乾淨。最後洗地呀姐一招「羅莽360」,將你架車噴濕返之餘,仲將地下被壓力槍沖起嘅污糟野一次過比埋你,你嘅時間亦就咁浪費左。

3. 車房搞完架車即刻再出事

親眼見過一位朋友剛剛去車房換完避震同裝左頭唇。但由於我呢位朋友一向出車都好似去搶野咁,又大油又唔習慣打斜出,加上車房條膊都唔係低,係咁多位師傅叫都叫唔切嘅情況底下,條頭唇只係玩左兩分鐘就收左皮。

4. 被入錯油

你有你叫「黃金入滿」,佢有佢幫你「柴油打爆」。佢開始入嘅時候睇住都仲有得挽,不過我老豆個同事就唔好彩,入完見到打爆缸個價錢平到咁就知道gg,唯有即刻放哂啲油出黎再入過,而好彩嘅係佢當時未撻著引擎,如果唔係都幾大獲。

5. 新年愛車大掃除 親戚冚家幫你打回原形

年廿八呀媽就係屋企大掃除,作為孝順嘅你,緊係都會幫手打掃下…自己架車啦。將一啲係車籠車尾唔要嘅野扔哂佢,再買個大箱返黎執得整整齊齊,再用高級清潔用品抹到張櫈立立令。不過新年臨近,好多時身不由己,要出動到自己架車加屋企架車載埋親戚一齊去拜年。不過親友大多都係一袋二袋又乾又濕嘅野。一上車就先掉哂啲野上車,再抱埋自己啲小朋友坐大脾,而小朋友見到司機櫈有字又有黑色格仔(碳纖),就會激發起佢地四肢嘅活動能力,單單十分鐘車程,你架車就好似返返去大掃除之前一樣。

6. 人肉霸位

上左年紀有老公嘅女人常做動作,一百幾十隻cam影左你個樣,你就為左個車位比人放埋上Facebook,值得咩?小編一向都泊停車場,識揀或者有得揀泊個有商場優惠嘅,又唔洗爭,又唔洗錢泊車,唔好得過街位咩?

7. 過隧道比錢 前車花時尤如開戶口

有無遇過(電單車人士唔計)一啲司機,佢地去到隧道口比錢個時,先開始搵散紙出黎比錢?最誇張個次係小編前面架車個司機搵左十幾秒之後,先發覺個銀包係車尾,之後打死火燈先落車拎,條龍已經由兩架車排到十幾架。其實如果明知自己要過海,點解唔搵定啲散紙放係易拎嘅地方呢?方便自己又方便人地。

8. 月球地心吸力速度離開停車場

趕停車場出閘時間大家都試過,眼見仲有兩分鐘,快速落五層樓應該無問題。點知去到二樓嘅時候遇著一個好似iPhone Slow Motion咁司機係你前面以每小時5公里駛往出閘位,然後到你拍八達通嘅時間,顯示泊車時間:2小時1分鐘,你個刻真係想好似對住GT Sport啲L樣咁撞佢出去。
無奈事仲有太多未能盡錄,你都分享下啦。

Related POSTS