11 Apr, 2017 By vincentcheung@scmedia.com.hk
Aston Martin 一向同英國航空業及英國空軍關係友好，繼舊年推出向噴火戰鬥機致敬嘅 V12 Vantage S Spitfire 80 特別版後，車廠客製化部門 Q 今年再度出手，與英國皇家空軍合作打造僅限量十部嘅 Vanquish S “Red Arrows” 特別版跑車。
車身採用英國皇家空軍旗下鷹式教練機 (Hawk trainer aircraft) 一樣嘅 “Eclat Red” 色調，再點綴藍、白色線條呼應英國皇家空軍嘅 logo 顏色。碳纖車頂則加上代表「猛衝」嘅特別箭咀圖案，而車頭 Aston Martin 飛翔大鵬標誌則換上英國國旗顏色。另外，軍綠色車廂中特別係座椅後加咗個存放頭盔嘅位置，集飛行同賽車元素於一身，車廠講明會捐出第十架予英國皇家空軍慈善基金作籌款用途，換句話即係得九部流出市場，相當矜貴!
