福特（Ford）Crown Victoria x 勞斯萊斯（Rolls Royce）Meteor V12引擎
曾經喺我嘅精神分裂系列裏面所出現過嘅車，絕大部份都係將一副高性能車嘅引擎，移植到另一部車嘅身上。但今集有少少唔同！
喺瑞典見到嘅精神分裂系列，比較常見會係富豪（Volvo）240/740/940 用上美國通用汽車（General Motor）嘅LS系列 V8，又或者再分裂啲用豐田2JZ引擎。但係呢位Daniel Werner，就完全離開佢哋嘅本土概念，去打做佢自己嘅精神分裂系列。
一
一路以來Daniel想將一副大容積引擎，放落部Crown Victoria 裏面。因為呢部車嘅引擎空間超大，差不多咩引擎都可以放得落。我哋香港人好清楚端典人，係好叻運用空間，你睇吓Ikea就係典型例子！所以，車主就索性去睇一副第二次世界大戰時用嘅勞斯萊斯（Rolls Royce） 嘅Merlin戰機引擎，但係因為價錢問題，佢唯有推求其次，買咗一副同廠嘅姊妹Meteor坦克車用引擎。
呢副流星（Meteor）引擎喺1942-1964期間應用喺第二次世界大戰英國軍隊嘅坦克車上。容積有27公升（係呀！我冇打錯呀！27,000cc呀！），60° V12汽缸，單凸輪軸，電油引擎，馬力600匹＠2,400rpm ，扭力1,450lb/ft。單睇數字已經不得了。但係Daniel搞得咁大壇嘢，又點會只係直上引擎咁簡單呢？
為方便引擎調校，佢度身訂造一套電子點火以及燃油噴注系統，用上一副可調校引擎電腦。入風改用鋁造進氣。為增加更高引擎用上大馬力拖拉機用活塞杆螺絲，令到最高轉數再提升。另外，Daniel將會加上一對超級大turbo，估計馬力可以提升到2,500匹馬力，而扭力增加至3,400lb/ft @ 3,400rpm，相信足夠將地球自轉倒轉行！
但係其實副引擎最高轉數只有3,500rpm左右，點樣將低轉數轉為可以用於車上嘅動力呢？一台經優化嘅美國通用汽車（General Motor） Allison TH400 三前速自動波箱幫到手，令到最高時速可以達到200mph。而放呢副相等於一部本田Civic (EG6)，有1,000kg咁重嘅引擎，車架優化用咗雪佛蘭Corvette(C4) 同埋C10系列貨車嘅車架部件，令到車架可以承受額外嘅重量。
到今日為止，Daniel仍然為佢嘅精神分裂系列介施工中。我相信除咗車架之外，還需要優化懸掛及制動系統。外觀及內籠還需要一番功夫。希望不久將來可以的見到佢美滿完成！