News  /  法國新「總統座駕」曝光
15 May, 2017    By Ball

法國新「總統座駕」曝光

隨著尋日法國新總統馬克龍 (Emmanuel Macron) 完成總統就職典禮,呢位新總統嘅「總統座駕」亦終於揭曉!!!

雖然之前盛傳馬克龍會選擇 Renault Espace 呢款 MVP 做座駕,不過原來係流料……「真命天子」係 DS Automobiles 旗下全新 DS 7 Crossback 先至真!!! 其實一向法國總統座駕都離不開 Peugeot、Citroën 同 DS Automobiles 呢「三巨頭」 (三者母公司同為 PSA Group) ,而早係 DS 未成為獨立品牌之前,第一任法國總統戴高樂已經係坐「前身」Citroën DS19,而係 1962 年戴高樂遇襲,就係靠 DS19 被射穿兩條胎後依然能夠保持平衡並高速駛離現場保住命仔,因此戴高樂同佢之後嘅唔少繼任人都對 DS 情有獨鍾,包括上一任法國總統奧朗德都係揀 Citroën DS5 Hybrid4 作為座駕。

睇番 39 歲嘅馬克龍作為「法國史上最年輕總統」,揀架 SUV 絕對合情合理,而且 DS 7 Crossback 內內外外都夠晒奢華,出大場面都絕對唔失禮! 而馬克龍坐嘅個架更係「總統」特別版,墨水藍色車身配黑色皮革內籠,重有四條經特別塗裝嘅 20 吋合金呔鈴,重有特製特大天窗,另外車身多處飾有法國國旗裝飾。而「街版」DS 7 Crossback 將於 2018 年 1 月 1 日先正式開售,睇下「總統專車」呢個光環會唔會幫到 DS 7 Crossback 嘅銷量啦!!!

不過好快就有內地網民出嚟「叨光」話東風幾年前入股 PSA,同法國政府及標緻家族並列 PSA 第一大股東,即係話法國總統都要坐有「中國血統」嘅車 wor!!!

尋日馬克龍首度乘坐 DS 7 Crossback 出席總統就職典禮,「最後生總統」坐 SUV,襯絕!

「總統版」DS 7 Crossback 有特製特大天窗,方便佢出巡「聽取民意」。

車身多處飾有法國國旗裝飾。

車身多處飾有法國國旗裝飾。

車身飾有法國國旗及「France」(法國) 之縮寫裝飾。

皮革內籠亦飾有「France」(法國) 之縮寫。